Ons Sentrum
ONS SENTRUM
Die Ons Sentrum waar kindertrauma aangehoor en hanteer word, open amptelik in Januarie 2019 in Pretoria-Noord nadat 'n groot behoefte aan terapeutiese dienste vir kinders en hulle gesinne in dié gemeenskap geïdentifiseer is. Kyk by https://helpendehand.co.za/maatskaplike-werkers/ na foto's en 'n artikel oor die bekendstelling.
Die Ons Sentrum bied hoofsaaklik terapie aan kinders wat enige vorm van trauma beleef het, insluitend emosionele, fisiese en seksuele mishandeling, verwaarlosing, verwerping, afsterwe van 'n geliefde, egskeiding, aanhoudende konflik tussen ouers, gesinsgeweld, afknouery, gedragsuitdagings, en so meer. Ons glo dat ouers 'n vangnet vir hulle kinders moet wees, veral gedurende die terapeutiese proses, en daarom bied ons ouerleiding en ander ondersteuning aan hulle. Dit is vir ons van kardinale belang om te strewe na uitnemendheid en daarom werk ons as 'n span terapeute saam aan elke saak om sodoende ook objektiwiteit, professionaliteit en eties korrekte praktyke te verseker.
Ons lei ook elke jaar 'n paar interns op wat belangstel om daarin te spesialiseer om met getraumatiseerde kinders te werk. Die opleiding word verskaf in samewerking met Forensic Assessment Consultation and Training (FACT) onder dr. Louise Aucamp. Ons voel sterk daaroor om terapeute op te lei sodat hulle ná hulle jaar internskap terapeutiese dienste van hoogstaande gehalte in die gemeenskap kan lewer. Ons is vas daarvan oortuig dat indien 'n kind se trauma so vroeg as moontlik behandel word, dit in die toekoms misdaad, werkloosheid en ander maatskaplike probleme in ons gemeenskappe kan voorkom.
Dienste wat aangebied word:
Sosio-emosionele kinderassesserings
Holistiese evaluering om te kyk na die kind se onderliggende emosies en behoeftes.
Interaksionele analise
Evaluering waar ouer-kind-verhoudings waargeneem word, ten einde dié verhoudings te herstel.
Terapie
Werk met die kind se trauma (gesinsgeweld, mishandeling, verwaarlosing, verlies, egskeiding, afknouery, ens.)
Ouerleiding
Ouers word met vaardighede toegerus volgens die kind se ontwikkelingsfase, emosies, persoonlikheid en ander behoeftes, tesame met berading, waar nodig.
Ouer-kind-verhoudingsbousessies
Aktiwiteite tussen ouer en kind word gedoen om dié belangrike verhouding te verbeter en te versterk.
Verwysings na ander professionele dienste
Kinders word verwys na, onder andere spraak en/of arbeidsterapeute, opvoedkundige sielkundiges, oudioloë en neuro-ontwikkelingspeadiaters.
Tweedekansprogram
Skole verwys kinders wat dissiplinêr verhoor is, waar die gesin dan moet inskakel vir terapie om die kind binne die skoolsisteem te hou.
Internskapprogram
Gekwalifiseerde maatskaplike werkers word d.m.v. keuringsproses gekies om opleiding in kindertraumaterapie by FACT (Forensic Assessment Consultation Training) te ontvang en doen dan hul prakties by Ons Sentrum onder toesig van die hoof.
Hoe kan jy betrokke raak by die sentrum?
Die meeste van ons begunstigdes ontvang die diens gratis omdat dit ons hart is om gespesialiseerde dienste aan gesinne te lewer wat dit nie elders kan bekostig nie. Ons maak ons staat op donateurs en sal dit waardeer as jy die sentrum finansieel ondersteun. Ons kan 'n artikel 18A-belastingsertifkaat uitreik vir finansiële bydraes.
Ons maak ook staat op vrywilligers wat kan help om berading aan ouers te bied. Om daarmee te help, moet jy 'n gekwalifiseerde maatskaplike werker wees of ten minste 'n honneurs in sielkunde en relevante addisionele opleiding hê. Stuur asseblief jou CV na [email protected] as jy belangstel om ons op dié manier as vrywilliger by te staan. Neem asseblief in ag dat die Ons Sentrum met minderjarige kinders werk en dat polisieklaring dus 'n vereiste is. Dien dit saam met jou CV in.
Ons Sentrum se proses indien dienste benodig word
- Ons bied terapie aan kinders wat deur enige vorm van trauma en emosionele uitdagings gaan.
- Ons begin gewoonlik met 'n sosio-emosionele assessering, holistiese evaluering, om te kyk na die kind se onderliggende emosies en behoeftes. Dit neem 3-4 uur en ons doen dit oor drie sessies.
- Ons voer onderhoude met die ouers, skool en wie ook al nog nodig is om ons te help om soveel as moontlik inligting te kry om die kind beter te verstaan.
- Dan hou ons as professionele span by die terapiesentrum 'n paneelbespreking waarna ons 'n afspraak maak om verbale terugvoering aan die ouers te gee en om ons aanbevelings met die ouers te bespreek.
- Ons aanbevelings kan terapie, ouerleiding of wat ook al ons voel in die kind se beste belang mag wees, insluit.
- Daar is wel 'n klein koste aan ons dienste verbonde, maar daar is ook die opsie om aansoek te doen vir afslag of om die diens gratis te ontvang indien nodig.
Ontmoet ons personeel
Mareli Scholtz
Chantel Gouws
Mishca Heynemann
Kind beskryf wat sy frustrasie beker vol maak
‘n Demonstrasie in ouerleiding oor hoe belangrik dit is om jou kind se “bekertjie” vol te hou
Kind plaas seksuele oortreder in “tronk”
Sandspel
Statistieke van ons werk in 2023
Emosie gesiggies
Aggressiewe energie word gebruik om kinders bewus van hulle emosies te maak
Word deel van die Solidariteit Helpende Hand familie
Solidariteit Helpende Hand Ons Sentrum
(opens in a new tab)Ons Sentrum bied terapie aan kinders en hulle gesinne wat deur enige vorm van trauma gaan
